Psa 42 | NdeIBE | STEP | Kumkhokheli wokuhlabela. Imasikili yamaDodana kaKhora. Njengempala inxwanela imifula yamanzi, kunjalo umphefumulo wami uyakunxwanela, O Nkulunkulu.

Psalms 42

2 Ihubo 42–72

Kumkhokheli wokuhlabela. Imasikili yamaDodana kaKhora.

1 Njengempala inxwanela imifula yamanzi, kunjalo umphefumulo wami uyakunxwanela, O Nkulunkulu.

2 Umphefumulo wami womela uNkulunkulu, uNkulunkulu ophilayo. Ngizahamba nini ngiyohlangana loNkulunkulu?

3 Izinyembezi zami seziyikudla kwami imini lobusuku, lapho abantu besithi kimi ilanga lonke, “Ungaphi uNkulunkulu wakho?”

4 Lezizinto ngiyazikhumbula nxa ngizisola kakhulu ngidabukile: Ngangihamba labanengi, ngikhokhela udwendwe sisiya endlini kaNkulunkulu, sihlokoma ngentokozo langokubonga lexuku elithakazelela umkhosi.

5 Kungani wephukile na, hawu mphefumulo wami? Kungani udungekile kanje ngaphakathi kwami? Beka ithemba lakho kuNkulunkulu, ngoba ngisezakumdumisa, uMsindisi wami

6 loNkulunkulu wami. Umphefumulo wami wephukile ngaphakathi kwami; ngakho ngizakukhumbula kusukela esifundeni seJodani, iziqongo zaseHemoni – kusukela entabeni iMizari.

7 Inziki imemeza inziki phakathi kwenhlokomo yezimpophoma zakho; wonke amavinqo lokukhaphaka sekugabhela phezu kwami.

8 Emini uJehova uyaluqondisa uthando lwakhe ebusuku ingoma yakhe ikhona kimi – umthandazo kuNkulunkulu wempilo yami.

9 Ngithi kuNkulunkulu iDwala lami, “Kutheni usungikhohliwe na? Kutheni sengizula ngingolilayo, ngicindezelwa yisitha na?”

10 Amathambo ami ezwa ubuhlungu obungiqedayo lapho izitha zami zingihoza, zisithi kimi ilanga lonke, “Ungaphi uNkulunkulu wakho?”

11 Kungani wephukile na, hawu mphefumulo wami? Kungani udungekile kanje ngaphakathi kwami? Beka ithemba lakho kuNkulunkulu, ngokuba ngisezakumdumisa, uMsindisi wami loNkulunkulu wami.